ده‌رباره‌ی ئێمه‌

ده‌سپێك ته‌نیا به‌ڵێنه‌، به‌ڵێنی درێژه‌دانی پێوه‌ندیی، به‌رهه‌م، ئیده‌ یان سیاسه‌تێك. له‌م ره‌وته‌شدا سووژه‌ی به‌ڵێن ده‌كرێ تووشی ماندوویه‌تی، وازهێنان، په‌شیمانی و دوودڵی ببێت؛ یان به‌پێچه‌وانه‌وه‌، ‌نه‌توانێ گۆڕانه‌كانی خۆی و دنیای ده‌وروپشتی خۆی بناسێته‌وه‌ و به‌چركه‌ی سه‌ره‌تاوه‌ بنووسێت. ئه‌م دوو ئه‌گه‌ره له‌به‌رده‌م سووژه‌ی به‌ڵێنێكدا هه‌ن. بۆ ئێمه ‌ناوه‌خت به‌ڵێنی گۆڕینی دنیایه ‌به‌و كه‌ره‌ستانه‌ی كه‌به‌ده‌ستمانه‌وه‌یه‌، كه‌ هێشتا زمانه‌ له‌ فۆرمه‌ جیاوازه‌كانی ده‌ربڕیندا، بۆ گۆڕینی زمان خۆیشی. ئه‌وانه‌ی به‌زمانێكی جیا له ‌زمانه‌كانی مۆدێرنێتی ده‌نووسن و بیرده‌كه‌نه‌وه‌باش له‌مه ‌تێده‌گه‌ن. ناوه‌خت به‌رهه‌می به‌ڵێنێكه ‌و هه‌میشه‌له‌سه‌ره‌تادا ده‌بێ، نه‌پارتی سیاسیه ‌و نه‌ مه‌دره‌سه‌ بۆ فێركردنی “نه‌زانان”، نه‌ لاشی وه‌هایه ‌كه‌ چه‌وساوه‌بوون به‌رهه‌می نه‌زانییه‌ و نه ‌لاشی وه‌هایه‌ ته‌نیا تیۆره‌ كه ‌دنیا ده‌گۆرێت، هاوكات پێداگرییشه ‌له‌سه‌ر ئه‌و پرسیاره ‌كلاسیكه‌ی كه‌ چه‌وساوان هه‌میشه ‌پرسیویانه‌: “چی بكه‌ین” و چیمان پێده‌كرێت؟ سنووره‌كانی وه‌ڵامه‌كه‌ بێكۆتایه‌، ئێمه‌ وه‌ڵامی كۆتایی نین، جگه ‌ئه‌وه‌ی ده‌زانین كه ‌سته‌م دۆخێكی سرووشتی نییه‌، یه‌كسانی ده‌سپێكه‌ و مه‌به‌ست نییه‌ و گه‌ر خه‌باته‌كه‌ بدۆڕێنین نه ‌خۆمان، نه ‌داهاتوان و نه‌ رابردوانیش ئاسووده ‌نابن. باسی ئاخرزه‌مان نییه‌، به‌ڵام مندالانی جه‌نگ ره‌نگه‌ هه‌میشه‌ دۆخی هه‌ره‌گرژیان له‌بیره كاتێ بیر له‌دنیا ده‌كه‌نه‌وه‌، بۆیه‌ هه‌ر چركه‌ بۆیان ده‌شێ چركه‌ی رزگاریی بێت. وه‌فاداریی به‌م چركه ‌هه‌میشه‌ییه‌ له‌ ئێسته‌ و له‌ ئێرده‌ا، مه‌به‌ستێكی بوونی ئه‌م سایته‌ و كۆی پرۆژه‌كه‌یه‌. ده‌مێنێته‌وه‌ درێژه‌دان و دیالێكتیكه‌ ناوخۆییه‌كه‌ی كه ‌چۆن و به ‌چ فۆرمی دیكه‌ خۆی وه‌رده‌گێڕێت.

ناوه‌خت به‌رهه‌می تاكه‌كه‌س، دامه‌زراوه‌ و ته‌نانه‌ت گرووپێكی دیاریكراو نییه‌، كارێكی به‌كۆمه‌ڵه ‌كه ‌به‌رده‌وام له‌ گۆڕاندا بووه‌. له‌م رێگه‌دا كه‌سانێك ده‌ستیان پێكردووه‌، كه‌سانێك ماندوو بوون و رۆشتوون و كه‌سانێكی نوێ هاتوون. ئه‌م ته‌نگژه‌‌ وه‌ك پێویستی و راستییه‌كی كاری به‌كۆمه‌ڵ له‌داهاتووشدا به‌رده‌وام ده‌بێت. ناوه‌خت هه‌تا ئێستا سه‌رنووسه‌ر یان ده‌سته‌ی نووسه‌رانی نه‌بووه ‌و خۆی له وه ‌پاراستووه ‌چالاكییه‌كانی بۆ تاكه‌كه‌س و ناو و سه‌رمایه‌ی هێمایین كورت بكاته‌وه‌. كۆڵه‌كه‌یه‌كی سه‌ره‌كی ناوخت له‌ ناوخۆی كوردستان و له‌ ئه‌ستۆی كه‌سانێكدایه ‌كه‌ به ‌تایبه‌ت له‌رۆژهه‌ڵات و باكووری كوردستانن و ‌ناتوانن به ‌ناوی خۆیانه‌وه ‌كار بكه‌ن. ناوه‌خت بریتییه ‌له‌م وێبسایته‌ كه ‌به‌ سێ زمانی كوردی، ئینگلیزی و فارسی له‌به‌ر ده‌ستدایه‌‌ و له‌ساڵی ٢٠١٦وه ‌وه‌ك گۆڤار چالاكییه‌كانی خۆی ده‌ست پێكردووه‌. له‌به‌شی كوردیی وێبسایته‌كه‌دا دوو پادكه‌ست هه‌یه ‌كه ‌‌به‌شدارانی ناوه‌خت له ‌درێژه‌ی هه‌مان ئیده‌كاندا ئاماده‌ی ده‌كه‌ن.